Fyrsti vinningurinn í Lottó um síðustu helgi hljóðaði upp á heilar 172.467.020 krónur og var hann sá stærsti hingað til. Af þeim 16.892 vinningshöfum sem fengu vinninga voru tveir spilarar þó heppnastir allra er þeir skiptu með sér sjöföldum fyrsta vinningi og hlutu hvor um sig rúmlega 86,2 skattfrjálsar milljónir.
„Þetta slekkur alveg á húsnæðisláninu“ var það fyrsta sem tæplega fimmtug hjón sögðu er þau mættu í Laugardalinn með vinningsmiðann en fjölskyldan sem býr á höfuðborgarsvæðinu hafði keypt miðann góða í Fjarðarkaupum í Hafnarfirði. „Við erum búin að vera á leiðinni að endurnýja bílinn í einhvern tíma svo það verður einnig klárað núna og svo verðum maður alveg að leyfa sér að leika sér smá“ sögðu vinningshafarnir brosandi, annars sögðu þau tilfinninguna vera algjörlega ólýsanlega og hvorugt þeirra varla enn farin að trúa þessu.
Hinn vinningshafinn, rétt rúmlega fimmtugur fjölskyldufaðir, hafði keypt sinn miða í appinu. Helgin var þéttbókuð og því hafði hann hvorki hugsað meira út í miðann né munað eftir því að segja konu sinni frá miðakaupunum. Hann hafði því enga hugmynd um vinninginn. „Ég var eiginlega á báðum áttum hvort ég ætti að svara þar sem ég kannaðist ekkert við númerið,“ sagði hann og hló. „Svo þegar ég svaraði og fréttirnar komu, þá hélt ég nú fyrst að þetta væri grín. Ég átti alls ekki von á þessum fréttum, bara aldrei. Vinningurinn kemur á afar hentugum tíma, þar sem fjölskyldan er búin að vera að reyna leggja pening til hliðar síðustu mánuði fyrir stórum viðburði á næsta ári og núna allt í einu er til fyrir honum öllum en fyrst af öllu verður að greiða upp lánin“ sagði vinningshafinn glaður.
Við óskum vinningshöfunum báðum innilega til hamingju og þökkum um leið veittan stuðning – sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu, þar sem þau njóta góðs af allri sölu Lottó.
