„...og einn Lottómiða. Sjálfval!“ bætti hún við áður en sonur hennar skaust inn í Fjarðarkaup til að kaupa nokkrar helgarvörur fyrir móður sína. Þessi Lottómiði breytti svo sannarlega miklu og bætti þessari heppnu frú í hóp þeirra fjölmörgu Íslendinga sem hafa orðið milljónamæringar í Lottó síðastliðin 40 ár.
Miðinn góði úr Fjarðarkaupum reyndist vera gulls ígildi. Hann var sá eini sem var með allar tölurnar réttar og skilaði eiganda sínum öllum sexfalda Lottópottinum, tæpum 130 milljónum króna. Konan, sem er á níræðisaldri, gerði sér þó ekki grein fyrir því fyrr en daginn eftir þegar sonur hennar sá fréttir af útdrættinum. Hann brá sér þá í heimsókn til móður sinnar og fór yfir tölurnar með henni. Þegar ljóst var að hún væri eigandi vinningsmiðans var hann umsvifalaust læstur inni í skáp og fyrst þá var hægt að deila gleðitíðindunum með hinum börnunum.
Þetta varð til þess að börnin hennar og makar áttu fremur svefnlitla nótt en konan sjálf sagðist hafa sofið eins og ungabarn þrátt fyrir stórvinninginn. Á mánudeginum var skápurinn opnaður á ný, vinningsmiðinn sóttur og ekið með viðhöfn í höfuðstöðvar Íslenskrar getspár í Laugardalnum þar sem vinningurinn var formlega staðfestur. Að því loknu var gleðin augljós og vinningshafinn sagðist vart hafa náð að meðtaka þessar stórkostlegu fréttir enn sem komið var.
Íslensk getspá óskar vinningshafanum og fjölskyldu hennar innilega til hamingju með vinninginn og þakkar um leið öllum spilurum fyrir veittan stuðning – sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu, þar sem þau njóta góðs af allri sölu Lottó.
