Það fóru efalaust margir í pottinn í sumarbústöðum landsins um síðustu helgi en fáir voru þó jafn lukkulegir og sá sem vann stóra pottinn í Lottóinu uppi í bústað með kærustunni. Þar var á ferðinni tæplega fimmtugur karlmaður sem nýtti sér tæknina í sveitasælunni til að kaupa Lottómiða í appinu á laugardeginum, enda fyrsti vinningur fjórfaldur. Þegar hann kannaði málið í appinu eftir útdráttinn blasti við stóri vinningurinn, uppá tæpar 54 milljónir.
Stóri vinningurinn eyðilagði spilakvöldið
Hinn heppni hafði þó sínar efasemdir og þorði ekki að trúa góðu fréttunum strax, hvað þá segja kærustunni frá. Laumuspilið gerði það hins vegar að verkum að illa gekk að einbeita sér það sem eftir var kvölds að hinum hefðbundnu spilum sem spiluð voru í sumarbústaðnum. Strax eftir helgina voru góðu fréttirnar svo staðfestar hjá Íslenskri getspá og þá gat þessi lukkunnar pamfíll loks andað léttar og greint kærustunni og börnunum frá þessum frábæru fréttum.
Við óskum vinningshafanum innilega til hamingju og þökkum um leið veittan stuðning sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu þar sem þau njóta góðs af allri sölu Lottó.
