Kona um fimmtugt hlaut fyrsta vinning í Lottó síðastliðinn laugardag og vann rúmar 9,3 milljónir króna í einföldum potti. Miðann keypti hún í Lottóappinu, líkt og hún er vön, og kom vinningurinn henni skemmtilega á óvart.
„Ég sá að fyrsti vinningur hefði farið á miða keyptan í appinu, en þar sem ég fékk enga tilkynningu um vinning eftir útdráttinn spáði ég ekkert frekar í því. Þess vegna kom símtalið frá starfsmanni Íslenskrar getspár á mánudagsmorgni mér algjörlega í opna skjöldu,“ segir vinningshafinn.
Vinningurinn kemur á afar hentugum tíma, þar sem hún er nýlega farin út í sjálfstæðan rekstur og hefur tekjustreymið því tekið breytingum. Hún segir að vinningurinn veiti henni aukið öryggi og svigrúm á þessum nýja kafla í lífinu.
Aðspurð um tölurnar segir hún að hún velji alltaf fyrstu röðina sjálf, en leyfi svo appinu að velja restina. „Það var einmitt ein af sjálfvalsröðunum sem skilaði vinningnum,“ segir hún og brosir.
Það eina sem er þegar ákveðið er að maðurinn hennar á ferð til Tenerife inni: „Við gerðum samkomulag á laugardeginum – ef hann myndi vinna myndi hann bjóða mér, og ef ég myndi vinna myndi ég bjóða honum. Það eina sem er 100% ákveðið núna er að hann á ferð til Tenerife inni!“
Þetta er í annað sinn á tveimur vikum sem fyrsti vinningur gengur út, því fyrir síðustu helgi kom annar vinningshafi í heimsókn til Íslenskrar getspár – kona um sextugt sem hafði unnið rúmar 9,2 milljónir króna í Lottó vikuna á undan. Hún hafði keypt miðann sinn á N1, Vesturbraut á Höfn í Hornafirði. Hún var ólýsanlega glöð og mátti sjá nokkur gleðitár falla um leið og hún afhenti vinningsmiðann.
Við óskum vinningshöfunum báðum innilega til hamingju og þökkum um leið veittan stuðning – sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu, þar sem þau njóta góðs af allri sölu Lottó.
