Ef þú átt einhversstaðar Lottómiða sem þú ert ekki búinn að skoða – þá er tími til þess að gera það núna, því Íslensk getspá auglýsir eftir vinningshafa frá
7. desember síðastliðnum en þann dag var einn með fyrsta vinning upp á tæpar 10 milljónir króna. Var miðinn keyptur í Skálanum í Þorlákshöfn en vinningshafinn er enn ófundinn.
Vinningstölurnar voru 5, 6, 7, 8, og 32. Við hvetjum alla sem keyptu sér lottómiða á þessum stað í byrjun desember að skoða miðana sína vel og vandlega því þar gætu leynst vinningstölurnar góðu sem færa þér tæpar 10 skattfrjálsar milljónir í vasann.
Vantrúaður vinningshafi fékk ógleymanlegt símtal
Rúmlega fimmtugur karlmaður gleymir seint símtali sem hann fékk í vinnuna á mánudaginn var. Þar var Íslensk getspá á línunni með fréttir um að miðinn sem hann hafði keypt í gegnum Lottóappið fyrir úrdráttinn laugardaginn 28. desember sl. hefði fært honum rúmar 11,7 skattfrjálsar milljónir.
Maðurinn trúði þessu engan veginn enda sannfærður um að vinnufélagarnir væru að gera grín að sér en sagði svo tilfinninguna algjörlega ólýsanlega. „Fyrsta verk verður að greiða niður smá skammtímaskuldir og láta lagfæra eina tönn sem setið hefur á hakanum en svo verður líka einhverju smá eytt í vitleysu“ sagði sá heppni með bros á vör.
Starfsfólk Getspár/Getrauna óskar vinningshafanum innilega til hamingju og þakkar um leið veittan stuðning sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu þar sem þau njóta góðs af allri sölu Lottó.
